Azərbaycanın bloqosferasında və ümumiyyətlə, virtual aləmində tanınmış MarketoBlog-un müəllifi, bizim hörmətli marketoloqumuz Vüsal Qəmbərov mənə marketinq haqqında yazmağı təklif etdi, sağ olsun mövzu üçün! Təəssüf ki, mən marketoloq deyiləm və marketinq haqqında savadlı, maraqlı və faydalı məqalə yaza bilməyəcəyəm, bu işdə Vüsal bəyə çata bilmərəm. Yazılarımın birində isə, söz vermişdim ki, bloqlar haqqında yazacağam. Bu yazım nə bloqlar haqqındadır nə də marketinq haqqında, bu yazı bloq marketinqi haqqındadır. Yəni bloqu necə tanıtmalı, qabağa çəkməli.

Deməli belə: mən yazımda söhbət açmaq istəyirəm ki, bloqu tanınmış, məşhur, ziyarət olunan və gələcəkdə ola bilsin, hətta, gəlir gətirən etmək üçün neyləmək lazımdır. Məndən soruşa bilərsiniz ki, – “yəni, sənin bloqun belə məşhurdur ki, bizi öyrədirsən”? Bloqumun nə tanınmış olması, nə məşhurluğu, nə ziyarətçi sayı ilə öyünə bilmərəm, gəlir barədə isə heç söhbət açmalı deyil, amma, bu o demək deyil ki, yazmaq istədiklərimin heç bir mənası yoxdur.

Mən bir bloqçu kimi təzəlikçə fəaliyyətə başlamışam, təqribən cari ilin aprel ayından bəri. Yəni bu işdə xamam. Lakin, bu qısa müddətdə bloqçluğa bir az alışmışam və artıq bu bloq işində azdan-çoxdan nəsə başa düşməyə başlamışam. Bu işdə təzə olduğum üçün, hər şeyi təzə-təzə öyrənirəm və yazım, əsasən, özüm kimi xam bloqçulara yönəlib. Təcrübəli bloqçular üçün, yazdıqlarım, əlbəttə ki, yenilik deyil, bəlkə də gülməlidir. Onlardan xahişim budur ki, səhvlərim olsa düzəltsinlər.

 Son vaxtlar TV-də Türkiyənin adı tez-tez çəkilir. Yaşadığım ölkə (Rusiya) üçün olmayan bir şey. Sözün düzü Türkiyənin adı rus TV-kanallarında yox, rus dilli versiyası olan beynəlxalq və Avropa kanallarında çəkilir, amma, yenə də çox təəccüblüdür. Məsələn, “Discovery” kanalında Türkiyə haqqında cürbəcür verlişlər göstərirlər, veriliş arası fasilələrdə türkləri danışdırırlar, hətta reklamda belə Türkiyə təqdim olunur. MTV kanalında Almaniyda yaşayan türklər haqqında komik serial yayımlanır. Bu cür misallar az deyil, axtarsaq bəlkə də lap çox taparıq. Görəsən bu nədəndir? Nə kampaniyadır belə, başlayıb? Xeyir ola? Bu Türkiyəmidir – özünə PR edir, yoxsa Avropadır – Türkiyəni dünyaya təqdim edir? Nədənsə mənə elə gəlir ki, bu Avropanın işidir. Yəni, Avropa öz cəmiyyətini türklərin gəlməsinə hazırlaşdırır. Avropa elə bil deyir ki, – “Baxın, türklər də bizim kimi adi insanlardı, qorxmayın!” Ümumiyyətlə belə bir təəssürat yaranır ki, Türkiyənin Avropa İttifaqına qəbul olunması artıq həll olunmuş məsələdir, sadəcə Avropa bir az vaxt istəyir, Türkiyənin öz ittifaqına qəbul etməyə tələsmir, hətta uzadır, ləngidir, qəbul etməmək üçün bəhanə axtarır, sanki, – “Mən hələ hazır deyiləm. Yox e-e hazıram, amma qorxuram” deyir. Məncə, vaxt da ona görə lazımdır ki, Avropa cəmiyyəti türklərin gəlişinə psixoloji hazırlaşsın, bəri başdan onlara öyrənişsin və Türkiyə nəhayət qəbul olunanda bunu rahat qarşılasın. Təbii ki, bunlar mənim şəxsi təəsürat və fikrlərimdir. Hər halda, məncə yaxın gələcəkdə, biz Türkiyəni Avropa İtifaqının daxilində görəcəyik.

Çoxdandır ki, bloqda heç nə yazmıram. Deyəsən janrın krizisindəyəm, ilham məni tərk edib. Nə isə, yavaş-yavaş yazacağam.

Bu gün bloqumun statistikasına ətraflı baxdım, maraqlı nəticələr var. Kimə maraqlıdırsa girib baxa bilər, sayğaclarımın statistikası hamı üçün açıqdır. İndi isə istəyirəm sizi həmən statistikanın əsasında yaratdığım onluqla tanış edim. Mən, bu onluqda, o saytları göstərirəm, hansı ki, həmən saytlardan ötən iki ay ərzində mənim bloquma ən çox keçid olunub. Bu saytlar aşağıdakılardır:

Hamıya məlumdur ki, Azərbaycan dilini dəstəkləyən şriftlər olduqca azdır. Hansısa gözəl bir şrifti istifadə etmək istəyəndə məlum olur ki, bu şriftdə “ə” hərfi, bəzən isə əlifbamıza məxsus olan digər hərflər də yoxdur. Bununla yəqin ki, çoxları rastlaşıb. Təbii ki, bu dizaynerlər üçün də problemdir və onların yaradıcılıqlarını məhdudlaşdırır. Dizaynerlər, müxtəlif üsullarla lazım olan hərfləri şriftlərə əlavə edərək bu problemi həll edirlər. Bəziləri sadəcə “e” hərfini çevirirlər, başqaları isə “ə” hərfini sıfırdan çəkirlər. Nəticədə alınmış “ə”-ni, bəzi mahirlər şrift proqrammlar vasitəsi ilə, şriftə əlavə edirlər və mətni həmən, əldəqayırma, şriftlə yığırlar. Yəni problem müəyyən çətinliklər yaradsa da, həll olunur.

Bu yaxınlarda hər gün izlədiyim bloqların birində məşhur xəbərlər portalı olan Day.az-la əlaqədar maraqlı bir məlumat oxudum. Oxatan.com bloqu Webxana.com bloquna istinad edərək məlumat verirdi ki, Day.az Mail.ru reytinqinin qaydalarını pozduğuna görə, həmən reytinqdən çıxarılıb. Eyni zamanda Oxatan.com bloqu təxmin edir ki, Day.az-ın reytinqdən çıxarılmasının əsl səbəbi, onun Mail.ru-nun əleyhinə keçirtdiyi aksiyanın əvəzində Mail.ru-nun ona qisasıdır. Bundan əlavə, Oxatan.com, bu mövzu barəsində müzakirə ilə tanış olmaq üçün online marketinq jurnalı Mak.az-ın forumunu da ziyarət etməyi təklif edir. Bu müzakirədə Day.az-ın rəhbəri Elnur Baimov da Editor niki altında iştirak edir.