Dünən, Azart — rəqəmsal incəsənət birliyi adlanan Azərbaycan dizaynerlər forumunda bir gənc, istedadlı və qabiliyyətli dizayner Samir Hüseynovla AzNet termini barəsində mübahisəmiz oldu. Söhbət ondan başladı ki, AzNet anlayışını kim necə başa düşür və əslində bu termin nə məna verir. Biz təyin etmək istəyirdik ki, AzNet deyəndə hansı saytları nəzərdə tuturuq. Nə isə, əgər sizə maraqlı olsa, forumdaki mübahisəmizi Azart.az-da oxuya bilərsiniz. Burda isə mən, AzNet anlayışı haqqında öz fikirlərimi sizə çatdırmaq istəyirəm. Yəni, bu termini mən necə başa düşürəm.

Bildiyimiz kimi, internetdə sərhəd və senzura yoxdur, internet elə bir məkandır ki, burda hər kəs, hər şey haqqında və istədiyi formada öz fikirlərini ifadə etməkdə azaddır. İnternetdə insanları bir-birindən ayıran yalnız dildir. Dünyada mövcud olan bütün dilləri bilmək mümkün deyil, buna görə də, internet aləmində, müxtəlif dilli insanların arasında çətin keçilən sərhəd yaranır.

AzNet. Azərbaycan interneti. Bu anlayışı biz necə başa düşürük? AzNet deyəndə, biz hansı saytları nəzərdə tuturuq? Bu domeni .az olan və ya azərbaycanlılar tərəfindən düzələn, ya da ki, Azərbaycan haqqında olan, yoxsa Azərbaycan dilində olan saytlardır? Mənim qəti fikrim budur ki, AzNet — Azərbaycan dilində olan saytlar icmaasıdır. Gəlin araşdıraq, məsələn, əgər .az domenli saytda rus dilində və ya başqa bir dildə filateliya (ya da başqa nəsə) haqqında yazılırsa, bu sayt hələ AzNet-lik deyil, həmən saytı hansısa azərbaycanlı yaradıbsa da, bu sayt yenə də AzNet-lik deyil, lap saytın daxilində Azərbaycan filateliyasına ayrıca bir bölmə ayrılıbsa da, heç onda da bu saytı və içində Azərbaycan filateliyasına ayrılmış səhifəni AzNet-ə aid etmək olmaz. Lakin həmən sayt Azərbaycan dilində olarsa, o, domenindən, yaradıcısından, sahibindən və mövzusundan aslı olmayaraq AzNet-ə aiddir. Mənim fikrimcə, sayt bütövliklə Azərbaycana həsr olunsa da, amma, Azərbaycan dilində deyilsə, bu sayt AzNet-ə daxil olunmur. Əksinə, hər-hansı bir saytda Azərbaycan dilində kiçicik bir səhifə varsa, onda bu saytı asanlıqla AzNet-ə aid etmək olar. Azərbaycan interneti Azərbaycan dilində olmalıdır!