Yay işləmək vaxtıdır!

İyul 26, 2008 19:18
Həsənəlizadə Ramin

QWERTY nikli bloqçunun və Mak.az forumunun fəal iştirakçısının İMHO bloqunda maraqlı yazıya rast gəldim. Bu yazıda gənc mütəxəssislərə və tələbələrə gələcəkdə karyera qurmaq və yaxşı bir yerə işə düzəlmək üçün faydalı məsləhətlər verilir. Mən isə, işə girib, artıq işləyənlərə məsləhət vermək istəyirəm.

Yay – tətil, məzuniyyət vaxtıdır, bu isti aylarda çox adam işləmək əvəzinə istirahət etmək istəyir. Lakin, çox vaxt elə olur ki, yayın ən yaxşı, ən qızğın ayları məzuniyyətə gedənlər köhnə işçilər olurlar. Təzə işə düzələnlər, gənc işçilər isə, onları əvəz etməyə məcbur olurlar. Müəyyən vaxt ərzində bu gənc işçilər öz əsas işindən, vəzifəsindən əlavə, məzuniyyətdə olan bir, bəzən iki və hətta üç kolleqasının vəzifəsini yerinə yetirməyə məcbur olurlar. Sizinlə belə olub? Çətin olur deyilmi? Əslində isə buna sevinmək lazımdır! Bu vaxt – təsəvvür edilməz karyeranın bünövrəsini qoymağın əsl vaxtıdır!

Sizin məzun kolleqalarınız dənizdə çimib, çimərlikdə uzanan, isti qumda sərilib, özlərini günə verib həzz alan, sərin ofisdə ağarmış bədənlərini günəşin altında qaraldan zaman, siz ofisdə dəli kimi o yana, bu yana qaçacaqsınız, bir əlinizlə klaviaturada işıq sürəti ilə kor-koranə mətn yığa-yığa, digəri ilə printerə kağız yükləyərək, çiyninizlə telefonu qulağınıza sıxıb müştəri ilə danışıq aparacaq və eyni zamanda sağ ayağınızın üstündə dayanıb sol ayağınızla digər müştəriyə faksla ticari təklif göndərəcəksiniz. Bu işləri yerinə yetirəndən sonra, sizə təcili olaraq hesabat etmək və ya hansısa tədbirin smetasını hesablamaq, gedib ofis ləvazimatlarını almaq, axşam evə gedəndə isə, yolüstü, bank bağlanmamış, ödəniş zəmanətlərini aparmaq lazım olacaq. Və beləcə də hər gün… Yay üçün arzuolunmaz perspektivdir, deyilmi? Amma, bunun yaxşı tərəfi də var! Bu bir-iki qaynar ayı istifadə edib, özünüzü yaxşı tərəfdən göstərə bilərsiniz. Əgər bu qısa müddət ərzində siz özünüzü intizamlı, vahiməyə düşməyən, çətinlikllərdən qorxmayan və vaxtınızı işlərin vacibliyindən asılı olaraq müəyyən edən bir əməkdaş kimi göstərsəniz, bunu mütləq görəcəklər və çox güman ki, sizin məzuniyyətinizdən qabaq sizə daha yüksək vəzifə təklif edəcəklər. Bu təklifi məzuniyyətdən bir neçə gün öncə edirlərsə, bu o deməkdir ki, sizi qiymətləndiriblər və sizi itirmək istəmirlər, çünki çox adam məzuniyyət vaxtı özünə başqa iş axtarır. Əgər belə bir təklif edilməyibsə üzülməyin, sizin məzuniyyət zamanı təzə iş tapmağa vaxtınız olacaq. Çox güman ki, siz onu tapacaqsınız da, axı siz yeni biliklər və qiymətli təcrübələr əldə etmisiniz (sol ayaqla faks göndərməyi hər adam bacarmır).

Belə də ola bilər ki, siz məzuniyyətdən sonra qayıdanda biləcəksiniz ki, sizi daha yüksək vəzifəyə keçirmək istəyirlər, bu halda sizin artıq seçiminiz olacaq: təzə işə getmək, yoxsa köhnə işdə yeni vəzifəyə keçmək.

İnanın ki, yay gənc mütəxəssis üçün yaxşı bir şansdır! Mən iş həyatına qədəm qoyduğumdan bəri belə bir vəziyyətlə iki dəfə qarşılaşmışam və hər ikisində də vəzifəm yüksəlib. Bilmirəm, bəlkə, sadəcə bəxtim gətirib, amma, məncə bu həyatda heç nə təsadüf deyil. Buna görə də gənclər, məqsədiniz zirvədirsə, bilin ki, yay – işləmək vaxtıdır!