Əziz dostlar sizi bloqumun ötən iki aylıq statistikasının əsasında hazırlanmış növbəti siyahı ilə tanış etmək istəyirəm, bu dəfə onluğu artırdım və on beşlik elədim. Ötən iki ay ərzində mənim bloquma ən çox ziyarətçi aşağıdakı saytlardan gəlib:

1. azeriblog.com (keçid vermək hələ də olmur, Fərhad bəy gör neyləyirsən!)

2. google.com

3. eldesign.ru

4. blogcatalog.com

5. blograzzi.com

6. shebnem.azeriblog.com

7. xebername.com və ilk10.com

8. ferhad.azeriblog.com

9. webxana.com

10. ruzigarim.azeriblog.com

11. harunguven.blogspot.com

12. inet.az

13. maklayaq.blogspot.com

14. vuqarismayilov.azeriblog.com və mayismusayev.azeriblog.com

15. mvusal.azeriblog.com

Bu saytların və siyahıya düşməyən digər saytların idarə etmə heyətinə, bloqçulara, oxuculara və ziyarətçilərə öz minnətdarlığımı bildirirəm. Çox sağ olun, əziz dostlar!

Hörmətli oxucular, yəqin ki, bloqumda “Müsahibələr” bölməsinin açılmasını artıq müşahidə etmisiniz, bu gündən etibarən bloquma, fikrimcə, maraqlı şəxsləri dəvət edəcəyəm və onlarla söhbətimizi bloqumda dərc edəcəyəm. Bloqumun bu günkü və ilk qonağı — jurnalist, müəllim və “Belə baxanda” adlı məşhur bloqun müəllifi Vüsal Məmmədovdur.

***

— Salam Vüsal bəy! Sizi bloqumda görməyə çox şadam və bu söhbətimizə razılıq verdiyiniz üçün sizə təşəkkür edirəm. Fürsətdən istifadə edib sizi təbrik etmək istəyirəm, bu yaxınlarda sizin 30 yaşınız tamam olub, bloqunuzun isə yaxın gələcəkdə bir yaşı olacaq. Sizi ürəkdən təbrik edir, can sağlığı və işlərinizdə müvəffəqiyyətlər, bloqunuza isə çoxlu ziyarətçilər və yüksək reytinqlər arzu edirəm!

— Çox təşəkkür edirəm, Ramin bəy. Məndən təxminən 10 yaş böyük olan bir dostum həmişə deyir ki, bəlkə də 20 və 30 yaş arasında 10 il məsafə var, amma 30 ilə 40-ın arasındakı vaxt 10 ildən xeyli azdır. Mən özüm bunu hiss edirəm. İndi mənim üçün ay, həftə, gün, saat məsələn, 25 yaşında olduğu kimi deyil; hamısı qısalıb, sürətlənib. Son bir ildə hiss edirəm ki, artıq “gözləmək” anlayışı yoxdur — hətta bir neçə ay sonrakı hadisəni də sabah olacaqmış kimi yaxın bilirəm. Hiss edirəm ki, ömür xeyli sürətlənib, axıb gedir. Vaxtın və yaşın amansızlığını duymağa başlayıram.

Azərbaycanın bloqosferasında və ümumiyyətlə, virtual aləmində tanınmış MarketoBlog-un müəllifi, bizim hörmətli marketoloqumuz Vüsal Qəmbərov mənə marketinq haqqında yazmağı təklif etdi, sağ olsun mövzu üçün! Təəssüf ki, mən marketoloq deyiləm və marketinq haqqında savadlı, maraqlı və faydalı məqalə yaza bilməyəcəyəm, bu işdə Vüsal bəyə çata bilmərəm. Yazılarımın birində isə, söz vermişdim ki, bloqlar haqqında yazacağam. Bu yazım nə bloqlar haqqındadır nə də marketinq haqqında, bu yazı bloq marketinqi haqqındadır. Yəni bloqu necə tanıtmalı, qabağa çəkməli.

Deməli belə: mən yazımda söhbət açmaq istəyirəm ki, bloqu tanınmış, məşhur, ziyarət olunan və gələcəkdə ola bilsin, hətta, gəlir gətirən etmək üçün neyləmək lazımdır. Məndən soruşa bilərsiniz ki, – “yəni, sənin bloqun belə məşhurdur ki, bizi öyrədirsən”? Bloqumun nə tanınmış olması, nə məşhurluğu, nə ziyarətçi sayı ilə öyünə bilmərəm, gəlir barədə isə heç söhbət açmalı deyil, amma, bu o demək deyil ki, yazmaq istədiklərimin heç bir mənası yoxdur.

Mən bir bloqçu kimi təzəlikçə fəaliyyətə başlamışam, təqribən cari ilin aprel ayından bəri. Yəni bu işdə xamam. Lakin, bu qısa müddətdə bloqçluğa bir az alışmışam və artıq bu bloq işində azdan-çoxdan nəsə başa düşməyə başlamışam. Bu işdə təzə olduğum üçün, hər şeyi təzə-təzə öyrənirəm və yazım, əsasən, özüm kimi xam bloqçulara yönəlib. Təcrübəli bloqçular üçün, yazdıqlarım, əlbəttə ki, yenilik deyil, bəlkə də gülməlidir. Onlardan xahişim budur ki, səhvlərim olsa düzəltsinlər.

“Elimiz Online IT Group” şirkətinin yaratdığı azeriblog.com saytı ilə mən nisbətən təzəlikcə, amma, gördüyünüz kimi, yaxından tanış olmuşam. Yəni burada bloq açmışam və azdan-çoxdan (düzünü desək, təəssüf ki, azdan, nəinki çoxdan) fəaliyyət göstərirəm.

Saytın əsas səhifəsində hamı görə bilər ki, artıq 3500-dən çox bloq və 31600-dən yuxarı yazı mövcuddur. Sevindirici haldır ki, bloqların sayı artır və yazılar da çoxalır. Bunların içində faydalı və maraqlı yazılar (çox olmasa da) var. Nə isə, bloqlar haqqında mən daha sonra və daha ətraflı yazı yazacağam, burda isə, mən istərdim sırf azeribloq.com xidmətinin bəzi müsbət və mənfi cəhətlərini qeyd edim. Əlbəttə ki, qeyd edəcəyim cəhətlər yalnız və yalnız mənim şəxsi fikirlərimdir.

Hörmətli oxucular, ilk növbədə, bu bloqa maraq göstərdiyinizə görə, sizə, öz minnətdarlığımı bildirirəm.

Mənim adım Ramindir. Həsənəlizadə Ramin Əsgər oğlu. Mən, bu bloqda, diqqətimi cəlb edən, məni maraqlandıran və zənnimcə aktual olan hər bir şey haqqında öz fikirlərimi yazıram. Buna görə də, bloqu hər şey haqqında adlandırdım. Ümid edirəm ki, yazdıqlarım sizin üçün maraqlı və faydalı olacaq.

Hər şey haqqında bloqunu, mən ilk dəfə az-zone.net pulsuz bloq xidmətində açmışdım, az-zone.net/hasanalizade səhifəsində. Həmən sayt rus dilli saytdır, intası mən orda Azərbaycan dilində yazırdım. Azərbaycan dilli bloq xidmətinin mövcud olmasını bilmirdim, buna görə də rus dilli saytda bloq açmışdım. Azeriblog.com bloq xidməti haqqında biləndə, təəssüfləndəm ki, vaxtında yaxşı axtarmamışam. Bir az düşündükdən sonra qərara gəldim ki, bloqumu azeriblog.com-a keçirdim. Bunun üçün köhnə bloqda olan bütün yazıları bura köçürtdüm və bu gündən etibarən hər şey haqqında bloqu öz fəaliyyətini burada davam edəcəkdir.

Həsənəlizadə Ramin

hasanalizade@hotmail.com